大鑊密探 (The Informant!)

電影根據作家 Kurt Eichenwald 以美國大企業明日之星Mark Whitacre 為藍本的小說改編。這個阿 Mark 一面在公司坐白金升降機位極人臣，另一面則因形勢所逼，做了 FBI 臥底搜集證據頂證公司價格壟斷，最後卻因偽造單據、瞞稅及洗黑錢，被判監九年，刑期比因他搜集的證據而被繩之於法的涉案人等長三倍。

單看故事，應該高潮迭起步步驚心，何況阿 Mark 還患有躁鬱症，理應好戲連場。不過，導演 Steven Soderbergh 選擇舉重若輕，想觀眾笑住嚟睇，可惜，我就真的唔多笑得出。

我甚至不同情嗰個冇受過專業特務訓練但做足卧底三年的 Mark哥。電影所見，呢位仁兄講嘢冇句真，分分鐘連自己都呃埋，做卧底三年期間，侵吞公司資產$1,150萬 (重係佢唔小心認咗嗰筆咋喎 )，錢後來亦不能全數起回歸還公司。坐完監，情深款款的老婆同前途無限的好工又在虛位以待，你話，情何以堪？點笑得落？況且依家剛巧是金融海嘯一周年，想起華爾街那班害人害物的大話精，呢套戲簡直觸景傷情，唔知攞景定贈興。

最後，麥迪文 (Mark Damon) 的中佬造型可算一絕，不過，我唔 buy。