救命呼叫

Call centre 譯作 “ 呼叫中心 ” 已經非常救命的了，更要命的是有關人等無時無刻奪命追魂 call式狠狠地兜生意。

各位阿哥阿姐，我知道份工唔易做，我一向都以禮相待，所以當我向素未謀面的你講完：“ 唔好意思，我唔需要。” 之後，聽到你態度差勁的回應，真有點覺得你傷害了我的感情。

譬如，你可唔可以唔急不及待 cut 我綫呢？我都聽你 ( 雖則你們通常都𦧲晒脷地、或含住粒欖核地講你代表嗰間公司名 ) 講晒開場白先啦。又或，我講罷 “ 唔需要” 之後，你又駛唔駛惡死能登咁搶白我：“ 小姐，你究竟唔需要啲咩呀？！” 阿姐，查實你有冇係咁易諗過，有冇人會因為畀你搶完白深覺非常無癮後會聽你講落去的呢？ 更有甚者，有人試過說完 “ 唔需要 ” ，立刻又收多一次 “ 懲罰性 ” 來電。同理，決定唔幫襯的唔會因為閣下處事手法乞人憎而幫襯的，何不慳番時間和唇舌，打畀另一個？至少，相對前者9成9再度被拒絕的牌面看來，後者成功率有50%，值博程度高出太多。