不算無聊

雖然很少無端和人搭訕，搭的士有時也會遇着啱傾的司機先生，一程車時間轉眼便過。

昨天傍晚，甲蟲忽然開不動，在的士上致電車房師傅。可能聽得出我有點焦慮，司機先生待我收綫之後，笑容滿面對着倒後鏡向我說不礙事的，電池用久了便如是。臨下車，他轉過頭再次叮囑：“ 得㗎喇，換個電池攪掂。” 我趕忙連聲多謝。

另一個周末中午，購物完畢順手買了便當回家吃。司機伯伯說剛放低一個外賣奶茶回家嘆的客人，然後講起食經來。他說住在鰂魚涌，最喜歡搭一程電車到筲箕灣買餸，又平又靚。

又有一次，的士給踩着黃線的大巴士堵着，我講起近年駕駛者愈來愈不為其他人着想，包括他們的行家作興停在路中心、彎位或紅綠燈前上落客，司機先生深有同感。不知何故聊呀聊，聊到他的家事來。

司機先生說本行是判頭，十多年前香港工程買少見少，他便索性退休，閒時做的士替更。

前幾年女兒大了，大學畢業，開始囉嗦：“ 老豆，溫家寶一日做幾個鐘？”

“ 我諗8個鐘吧。”

“ 克林頓呢？”

“ 都有8個鐘啩。”

“ 咁你呢，老豆？”

“ 我咪係為咗呢個女，勤力啲做嘢囉。” 司機先生四萬咁口。

“ 你個女又乖又伶俐。”

“ 我細佬個女重叻，由細到大考第一。拿了獎學金去牛津讀法律，初時辛苦到喊，佢老豆肉赤叫佢番嚟喇，佢話人哋讀到佢冇理由讀唔到。”

“ 但係克林頓都係攞獎學金去嗰度讀的，你話啲學生幾猛！ ”

“ 前幾年佢畢咗業喇，而家喺英國做嘢。”

太好聽了。

差啲想唔落車。