寒戰

注意：以下文字雖然沒有透露劇情，但有可能影響閣下觀影樂趣。

電影頭一鏡，一看就知大鑊。往後100分鐘，只是不斷在印證我的觀感。

音樂：慌死大家唔記得佢存在地逼爆每場畫面。對白：大約15分鐘就有一次硬銷香港是全亞洲最安全城市，各紀律部門依法辦事，市民無有怕。化粧：郭富城跑咗幾條街之後，大特寫是連一粒毛孔都見唔到的滑溜美肌。造型：楊采妮據說是警察公共關係科阿頭，來個負離子直髮中間分界遮住半塊面不特止，竟然着 deep V 返工。技法：幾乎係人出場，都獲配兩行標題，列明姓名及職銜。如此交代人物，如非對自己講故事能力沒有信心，便是低手。

好了，講番啲好嘢。

梁家輝：在郭富城覇咗連番槍戰都不能移動它半分的硬gel騎樓頭斯文西裝友呢個位之後，梁家輝用老練淡定，把一個陸軍裝佬式造型演得奇峰突出，由頭到尾，都咁好戲。

故事：80後以他們的邏輯和規矩，向上一代宣戰，來宣洩因上不到位而積累的集體憤懣，甚至推翻現狀。劇本可以呈現的衝突，和對香港政治現況的指涉，其實應該可以更深入，更精采。現在卻是過於側重堆砌故事謎面，製造懸疑，失諸交臂。

場面：大角咀天橋槍戰一幕，出色。