乜周生你喺現場聽到甘乃威點同女助理傾偈咩？就憑你自翎有幾熟悉男人心態，就可以用權威口吻，老作有可能 “表示過好感” 但無用過 “愛” 字嘅對白，之後並以憐憫的姿態說這些對話會對甘太傷害有幾大嗎？
周生你自認老手有關經驗自然無人會有異議，但周融不代表甘乃威，你的經驗不能代表事實真相，怎能自說自話之後再下定論認為甘乃威已對其妻做成傷害？
反而閣下在今早《千禧年代》節目內，左一句“未必係愛，可能係慾”，右一句同女助理表示好感，“離婚啦！”，充滿挑釁性，簡直惟恐天下不亂，你對甘乃威的太太，刀刀見血，這才是真正殘忍！
閣下今早言論充滿歧視性語言，甚麼“黎明同劉德華追你就話話畀人聽啫，車！咁嘅樣...” 咁周生你係咪認為人人生而平等，不過冇咁靚仔嘅就註定低人一等冇運行？重有，周生你咁講，好似講到女人個個都係以貌取人咁，真實世界已經有好多實例話畀你聽你咁講錯得好交關。
做時事評論節目唔同喺茶樓同 friend 吹水，聽眾想聽的是客觀持平以及基於事實的分析，而唔係嗰隻“你話我話啦”、“呢家嘢我最有經驗”、“唔好話我睇死佢...” 等情感主導的閒話，又如 “你信一樣嘢啦，《蘋果》係最清楚呢單嘢嘅報紙...”
周生，你又冇理據話畀我哋聽為何《蘋果》最清楚呢單嘢，我哋又點可以無喇喇你話係我哋就信呢？
周融，請做回你的時事評論員角色，可以嗎？
相關連結：
香港電台《千禧年代》(6.10.2009)
沒有留言:
發佈留言