譚香文係邊位

係咪我 miss 咗？傳媒究竟有冇查證過譚香文有否獲當事人授權向傳媒發表 “解僱事件” 前因後果？直至目前為止，我看/聽過有關譚香文義憤填膺的控訴，包括早上香港電台及晚上有線電視的報道，譚香文都係 hearsay 咋喎，各傳媒卻不知有心定無意，當正係當事人親自現身，指斥甘乃威講大話，有違誠信。

乜查證消息來源的真確性唔係大學新聞系101必修課咩？民主黨先前說當事人乃資深議員助理，熟悉各投訴渠道及一己權利，但她依然選擇向黨投訴，並希望內部處理，昨天記者會上所披露的已事前徵詢當事人同意。另一邊廂，譚香文卻說為當事人不值，要向傳媒揭示惟一真相。

我不知真相是甚麼，但照上述情況顯示，實在事有蹺蹊。

整件事得一個涉嫌受害的當事人，如果民主黨同譚香文都100%如實覆述當事人的陳述，咁點解兩者版本相距如此大？究竟有人玩嘢，定係有人被玩？

事到如今，當事人不如現個真身作個了斷吧。橫豎有咁多蛛絲馬迹，包括閣下乃譚香文前助理都揚了出來，和公開了身分分別不大。戴上口罩和太陽帽，並和傳媒協議把聲音作出處理，親自向公眾釋疑，好過透過第三者覆述，恨錯難返有之，愈描愈黑有之，想非閣下所願。

民主黨，唔該不日就事件聆訊調查搵番個有 standing 的中立團體列席，否則他日死無對證，好多人額手稱慶。