好波

不招人妒是庸才。

今期美國汽車品牌佳士拿電視廣告，因為做得太好，成功晉身該國當紅眼中釘，被共和黨擁躉及其喉舌報抨擊為政治獻媚，替奧巴馬競逐連任造勢。該當何罪。

這個被人鬧到成為國際新聞的佳士拿兩分鐘企業形象廣告，單講概念已是天衣無縫之作。看官: 美國老牌汽車，配美國硬漢經典奇連.伊士活，講述美國傳統工業重鎮底特律矢志為美國經濟復蘇出力，以 “ It’s Halftime in America “ 為題，在美國人最重要美式足球賽超級碗 ( Super Bowl ) 播出，加上非常荷里活 A 級製作的拍攝手法，與非常荷里活 A 級製作的出色撰稿，美國精神，飛撲埋身。

硬係話佳士拿為酬謝奧巴馬政府注資72億美元助其度過難關的人，可能忘記了小布殊政府於2008年，簽署法案放行7,000億美元為全國企業救亡，佳士拿其時獲40億美元信貸。如果要報恩兼獻媚，2008年美國大選共和黨爭取繼續執政時佳士拿應該早就飛身撲出矣。再講，拍廣告講美國精神就可以討好當權者揾到着數，萬寶路個牛仔就唔會被逼全方位消聲匿迹。

不過諗諗吓，可能廣告老行尊 Paul Arden 講嗰句: Whatever you think, think the opposite係啱的。佳士拿用了大拿拿USD1,280萬在超級碗時段賣廣告，淨係接觸到美國本土區區1億1千3百萬觀眾，又點算值回票價啫？現下有共和黨忠實擁躉大罵實幫忙，佳士拿兩分鐘企業廣告幾乎足本在全球新聞頻道循環播放，又有我哋這類網上塘邊鶴推波助瀾，呢回真係蔗渣板價錢食出燒鵝味道了。

佳士拿、奇連.伊士活、廣告公司 Wieden+Kennedy:  Congratulations!

相關連結：