爛騷

1996年，梁耀忠一句 “臭罌出臭草” ，眾皆嘩然，認為這種粗鄙下等的用字遣詞有辱斯文，時任主席的黃宏發為此將他逐出議事堂。

如果今日有議員在立法會舊事重提梁耀忠乃香港史上首個被逐的議員這件瘀事，唔知梁議員又會否發老脾，以近年由講嘢到着衫都愈來愈唔駛同“斯文”兩隻字掛勾的議會文化舉證，替他那句“臭罌出臭草”平反。 何況是日立法會，詹培忠議員連人身攻擊的“大狀呃人”，咒人用的“X街”、“遲早死”，粗口諧音 “ 打「九」都出去” 都講得出，而主席曾鈺成只是出言“溫馨警告”，卻沒進一步實質行動，令人不得不再三思量，對那句對事不對人又至少隻隻字都寫得出的“臭罌出臭草”，當年的裁決是否過於嚴苛？此裁決令梁議員其時在全港市民面前受盡屈辱，立法會又是否應該向他道歉？

社會不會一成不變，包括價值觀。不過，都唔係變得咁離譜啩！香港七百萬人福祉所繫的議事堂，豈能變成粗口爛舌撩事鬥非的大笪地？

詹培忠今日在立法會的表現，如果他是在演舞台劇我拍爛手掌。可惜，他是議員不是演員，而且是，我沒辦法用選票來令佢唔好 “ lan” 番嚟嘅功能組別議員。 

對住咁爛嘅騷，或者，我惟一能夠做的，是熄機。

相關連結：

詹培忠2002年4月19日激動發言