載我的的士司機先生必定是天生笑底。我一上車他便嘰嘰呱呱說過不停，由長實剛公布減價一成賣樓問我點睇開始，一路點評時事一路笑，還說經常有政界名人搭他的車。因為他敬重長毛，所以載他那程唔收佢錢。
咁你對“佔領中環”點睇？我問。
其實，我係明知故問的。
“ 贊成！” 司機先生用一點都不激動的語氣笑着回覆我。
“有幾激啫。”
啊呀收到。
除了講政治，我還懷疑司機先生懂看相。他講講吓忽然遞給我一張名片：“ 去試吓幫襯呢間豬肉舖啦，開咗冇幾耐，就在這兒對落一條街。 賣本地豬， 所以冇落瘦肉精， 亦唔駛擔心飼料會落啲乜乜物物 ，貴係貴啲，但勝在夠肉味，食落去似番食豬肉就夠正啦。元朗農場養的，冇剩番幾間了。你知啦，養豬牌畀政府收吓收吓，就嚟冇晒㗎嘞。”
“ 支持吓佢哋啦，佢啲貨貴，我驚佢哋做唔住呀！”
“ 喜歡吃牛腩的話，去呢間啦。” 他又去找另一張名片。“ 在北角，新開的。我食過，好食過你數得出最出名嗰幾間。支持下佢哋啦，我最支持呢類小舖頭的。”
跟著慨歎內地來港的蔬菜質素每況愈下，作興把便宜貨傾銷過來。“幾十蚊一噸，別吃。” 然後千叮萬囑我不要買廿多塊便可以原條拎走的 “魚立” 魚。
我邊聽邊點頭，並認真地向他請教：“ 咁去邊度買菜同魚好？”
“ 冇㗎嘞，食少啲啦！”
唓！
沒有留言:
發佈留言